طريقة كتابة المواضيع و اضافة الصور و الفيديوهات

بسم الله الرحمن الرحيم

تكملة لموضوعنا اللى فات عن التسجيل فى المدونة و ازاى تبقا ناشر فى المدونة ،

انهارده هنعرف ازاى بعد ما بقيت ناشر ، تكتب مواضيع مرفقة بصور و فيديوهات و روابط لمواقع تانية ..

نبدأ ...

الاول هتفتح جوجل و بعدين تضغط على كلمة المزيد فوق .. هيظهرلك كلمة blogger هتضغط عليها ، و هتفتحلك صفحة بلوجر الخاصة بيك .

هتلاقى اسم المدونة بتاعتنا موجود ، تضغط على اسمها زى كده 

و بعد كده هتفتحلك صفحة الاعدادات الخاصة بالمدونة ،و اللى بيبقا فيها كل مواضيع المدونة  بحيث انك تقدر تعدل على المواضيع او تضيف عليها حجات،،المهم ..  هتختار منها كلمة ( مشاركه جديده ) علشان تضيف موضوع جديد .. و الصوره موضحه اكتر ..

هتفتحلك بعد كده صفحة تكتب فيها الموضوع بتاعك و عنوانه و اختيار القسم اللى هتنشر فيه الموضوع ، يعنى لو شوفت الصوره دى هتلاقيها شارحه كل حاجه ، ازاى تضيف صورة و فيديو و تختار القسم ، انا مثلا هنشر موضوعى ده فى قسم تقنيات التصوير فى المدونة ، تروح تضغط على كلمة ( تسميات) و تكتب اسم القسم ( تقنيات التصوير) ..

ايه بقا حكاية الارتباط دى ؟؟

انت مثلا هتضيف رابط لموقع معين او رابط لتحميل كتاب ، تروح ناسخ الرابط و لاصقه هنا ، لكن لما الموضوع يتنشر مش هيظهر للقارئ كانه رابط ينفع يضغط عليه و، لأ ده هيظهر كأنه جمله انجليزية عادى

(الارتباط) بقا هيا اللى بتحل المشكله دى .

ازاى ؟؟ 

انت هتحدد الرابط كله تظلله يعنى ، و بعدين تضغط على كلمة ارتباط ، و هتلاقى لون الرابط بقا ازرق ، ف ده معناه انه اصبح لينك ويب لموقع تانى ..

ف الصوره دى ، الرابط الاول معملتلوش ارتباط ، لكن التانى عملتله ارتباط ، حته هتلاقى فرق ف اللون بين الاتنين ..

نيجى بقا للأهم ، ازاى تضيف الفيديو ؟؟

انت لما تضغط على رمز الفيديو ف ادوات التنسيق ، هتفتحلك نافذه كده هيكون شكلها كده

و زى ما متوضح ف الصوره ، هتختار تانى واحد ف اليمين ، اللى هيا (منyoutube )

و هتكتب فى شريط البحث اسم الفيديو الكامل اللى انت عايزه ، و تضغط عليه و بعدين تنزل تحت و تختار (تحديد) ..

و هتلاقى الفيديو ظهرلك بالشكل ده

بعدين هتضغط على كلمة نشر ، هتلاقيها فوق على الشمال .

كده تمام ..

و افتكر مفيش حاجه فوتها ف شرح المدونة و التسجيل فيها و اضافة المواضيع و كيفية كتابتها و تنسيقها و اضافة الصور و الفيديوهات و لينكات تحميل الكتب ، يعنى لو حد مكنش عارف ازاى يستخدم المدونة ، اعتقد دلوقتى فهم كل حاجه عن الموقع و ازاى يستخدمه و ينشر عليه مواضيعه ..

تصنيف : عام